Trupti Akkalwar : ‘कुणालाही पैसे काढायला द्यायचे नाहीत’, सिद्धूचा बँकेत फोन अन् बदललं अभिनेत्याच्या पत्नीचं आयुष्य; म्हणाली, ‘मी डिस्टर्ब झाले’

सिद्धूचा एक फोन कॉल अन् बदललं तृप्तीचं आयुष्य

‘लोकमत सखी’ला दिलेल्या मुलाखतीमध्ये तृप्ती म्हणाली की, ‘२०२० मध्ये करोना काळात सगळेच घरी होते. करोनामुळे माझ्या पर्सनल आणि प्रोफेशनल आयुष्यात खूप मोठा फरक घडला. तेव्हा मी आणि सिद्धू २४ तास घरात होतो. तेव्हा माझी आणि सिद्धूची खूप छोटी मोठी भांडणं होत होती. पण आता मी मागे वळून बघते तेव्हा मला त्यावर खूप हसायला येतं. पण तो काळ खूप कठीण होता. एक दिवस मी किचनमध्ये ब्रेकफास्ट बनवत होते. सिद्धू बाहेर फोन करत होता. तो मला दिसत नव्हता. त्याच्या एक दिवस आधी आमचं भांडणं झालं होतं. त्याने बँकेत फोन लावला. आमचं जॉइंट अकाऊंट होतं. तिथे त्याने फोन लावला आणि तो म्हणाला, ‘हॅलो नमस्कार मी सिद्धार्थ जाधव बोलतोय. आजच्यानंतर माझ्या बँक अकाऊंटमधून मी चेक केल्याशिवाय तुम्ही तो चेक पास करायचा नाही, पैसे काढायला द्यायचे नाही.’ हे मी किचनमध्ये ऐकत होते. हे ऐकून मी हलले.’

तृप्ती पुढे म्हणाली, ‘२०२० पर्यंत सिद्धूचं सगळं फायनान्स मी सांभाळत होते. असं काही नव्हतं की, त्याला माहिती नव्हतं. घर त्याच्या नावावर होतं, आमच्या दोन गाड्या त्याच्या नावावर होत्या. त्यामुळे वैयक्तिक असं काही नव्हतं. फक्त माझं एक होतं की, मी आई-वडिलांच्या विरोधात जाऊन ज्या मुलाशी लग्न केलं आहे, त्या माणसाला मला सक्सेसफुल बनवायचं आहे. सक्सेस त्याचंच आहे पण आपलीपण जिद्द असते. त्यामुळे मी २०१३ ला स्वखुशीनं नोकरी सोडली होती. कारण तोपर्यंत सिद्धू सेटल झाला होता. दोन मुली होत्या. सिद्धूच्या पैशांवर आपण आपला संसार चालवू शकतो हा कॉन्फिडन्स मला आला होता.’

‘तो फोन कॉल झाला तेव्हा मी डिस्टर्ब झाले. आपल्याला कोणीतरी बिनपगाराच्या नोकरीवर काढून टाकलं आहे असं मला वाटलं. त्यानंतर त्याने आणखी एक-दोन फोन कॉल केले. त्यानंतर तो म्हणाला की, आजच्यानंतर मी माझ्या डेट्स वगैरे सांभाळेन. त्यानंतर मी पण त्याला म्हणाले, ‘आजच्यानंतर मी तुझं काही सांभाळणार नाही. तू तुझं-तुझं बघून घे.’
Sachin Goswami : विकृतीचा कळस! आक्षेपार्ह थंबनेल देऊन हास्यजत्रेचे एपिसोड पोस्ट; सचिन गोस्वामी प्रचंड संतापले
तृप्ती म्हणाली, ‘त्यानंतर मी पुष्कळ रडले. कारण तोपर्यंत माझ्यासाठी संसार महत्त्वाचा होता. मी खूप इमोशनल झाले होते. आपल्या आयुष्यात अशी फेज येईल असं मला वाटलं नव्हतं. आज त्या गोष्टीला मी खूप पॉझिटिव्ह घेते. मी खूप विचार करत होते की, मी आयुष्यात काय करू? मी जॉबसाठी मित्र मैत्रिणी, बॉसेसना फोन केले की मला जॉब करायचा आहे. पण मला कोणी जॉब दिला नाही. ही सिद्धार्थची जाधवची बायको आहे, हिला काय गरज आहे जॉबची असंही त्यांना वाटलं असेल.’
Yatin Karyekar : मराठी अभिनेत्रीसोबत लग्न अन् घटस्फोट, डिप्रेशनमध्ये गेलेले यतीन कार्येकर, दारूचं व्यसनही लागलेलं; सांगितली आपबिती
‘माझ्या आयुष्यात सिद्धूचं विश्व होतं. माझ्या आयुष्यात खूप मित्र-मैत्रिणी नव्हत्या. मी फॅमिली लाइफ एन्जॉय करत होते. त्याला माझी गरज आहे तर मी जाणार. त्याने जबरदस्ती केली नाही. पण त्याला वाटतंय ना तर मी आहे. मी त्याला सपोर्ट केलं. पण २०२० नंतर मी ठरवलं की, आपण काय आहोत, आपलं काय महत्त्वं आहे, हे सिद्ध करणं गरजेचं आहे. हा स्ट्रगल माझा माझ्यासाठी होता, कोणाला दाखवण्यासाठी नव्हता. मी आयुष्यभर अशीच डॅशिंग होते. पण मी स्वत:ला संसारात रमवून घेतलं होतं. मला कोणीही सांगितलं नव्हतं. याच्यापुढे असं काही तरी करू की, स्वत:ला आरशात पाहताना असं नको वाटायला की, आपला जन्म का झाला आहे आणि आणि आपण काय करतोय. तोपर्यंत सिद्धू बऱ्यापैकी सेट झाला होता. मग मी २०२० मध्ये माझा प्रवास सुरू केला.’ असं तृप्तीनं शेवटी सांगितलं.

दरम्यान, तृप्तीचं दादरमध्ये सलून असून तिची एक कंपनीसुद्धा आहे. त्याचबरोबर तृप्तीनं अलिबागमध्ये होम-स्टे कॉटेज सुरू केलं आहे.