शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या मार्गदर्शनाने शिवसेना नेते, युवासेना प्रमुख आदित्य ठाकरे यांनी युवासेना कार्यकारिणी सदस्यपदी राजोल संजय पाटील यांची नियुक्ती केली आहे. अशी माहिती युवासेना मध्यवर्ती कार्यालयातून देण्यात आली आहे.
माजी खासदार संजय दिना पाटील यांची ज्येष्ठ कन्या म्हणून राजोल पाटील यांची ओळख आहे. गेल्या काही महिन्यांपासून राजोल पाटील युवासेनेत कार्यरत आहेत.
संजय दिना पाटील कोण आहेत?
संजय दिना पाटील हे मुंबईतील प्रसिद्ध राजकीय नेते आहेत. २००४ मध्ये ते राष्ट्रवादीच्या तिकीटावर मुंबईतील भांडुप विधानसभा मतदारसंघातून आमदारपदी निवडून आले होते. त्यानंतर २००९ मध्ये त्यांना शरद पवारांनी लोकसभेचं तिकीट दिलं. ईशान्य पूर्व मुंबई लोकसभा मतदारसंघातून निवडून आल्याने ते संसदेची पायरी चढले.
२०१४ मध्ये संजय दिना पाटील यांना आपल्याच मतदारसंघात पराभवाचा धक्का सहन करावा लागला. भाजप नेते किरीट सोमय्या यांनी पाटलांना पराभवाची धूळ चारली होती.
संजय पाटील यांचे वडील दिनानाथ भामा पाटील १९८५ मध्ये मुलुंडमधून आमदार होते. त्यांनी १९७८ आणि १९९० मध्ये भांडुपमधून विधानसभेची निवडणूकही काँग्रेसचे उमेदवार म्हणून लढवली होती.
