CJP Protest : चिन्मयी सुमीत मुलांसह सीजेपी आंदोलनासाठी दिल्लीत, दिग्दर्शक अभिजित पानसेही सहभागी, Video व्हायरल

सुमीत राघवनचा मुलगा नीरद सुमीतनं सोशल मीडियावर कॉकरोच जनता पक्षाच्या आंदोलनाचे फोटो आणि व्हिडिओ सोशल मीडियावर शेअर केले आहेत. अभिनेत्री चिन्मयी सुमीतसुद्धा मुलांसोबत या आंदोलनामध्ये सहभागी झाली आहे. त्याचबरोबर मराठी दिग्दर्शक आणि मनसे नेते अभिजित पानसेसुद्धा या आंदोलनात सहभागी झाले आहेत. अभिजित यांनी आंदोलनातील व्हिडिओ सोशल मीडियावर शेअर केला आहे.

अभिजित पानसे यांचा व्हिडिओ

हा व्हिडिओ शेअर करत अभिजित म्हणतायत की, ‘संसदेवर जो मोर्चा चालला आहे, त्या मोर्चाला मनसेचा आणि राज ठाकरे यांचा पाठिंबा आहे. प्रचंड मोठ्या संख्येने तरुण रस्त्यावर उतरले आहेत आणि त्यांच्या समर्थनार्थ दिल्लीत या आंदोलनात सहभागी झालो आहे. या आंदोलनादरम्यान लाठीमार करण्यात आला आणि अनेक तरुण जखमी झाले. हा आक्रोश एका गोष्टीसाठी आहे. बघू पुढे काय होतंय.’

दरम्यान, सीजेपी ६ जूनपासून जंतर मंतरवर आंदोलन करत आहे. नीट-यूजी परीक्षेतील अनियमितता आणि पेपरफुटीप्रकरणी केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी ही संघटना करत आहे. सोनम वांगचुक यांनीही या आंदोलनात सहभाग घेतला आणि उपोषण सुरू केलं. २२ दिवसांच्या उपोषणानंतर शनिवारी सोनम वांगचुक यांना दिल्लीच्या सफदरजंग रुग्णालयात दाखल करण्यात आलं. यानंतर, सीजेपीनं रविवारी ‘चलो संसद’ मोर्चाची घोषणा केली.