Western Railway TC Row: मुंबईत एसी लोकलमध्ये तिकीट तपासणीदरम्यान टीसी आणि प्रवाशामध्ये झालेल्या वादाचा व्हिडिओ सध्या व्हायरल होत आहे. मराठी भाषेत संवाद साधण्याची मागणी केल्यामुळे हा वाद सुरू झाल्याचं दिसून येत आहे. या प्रकरणाची प्राथमिक चौकशी सुरू आहे.
मराठीत बोलण्याची शिक्षा
नालासोपारा येथील तुकाराम हेगडे हे एसी लोकलने नालासोपारा ते दादर असा प्रवास करत होते. गाडी धावत असताना तिकीट तपासणी सुरू होती. त्यावेळी एका अमराठी तिकीट तपासनीसाने हिंदीत तिकिटाची विचारणा केली. त्यावर हेगडे यांनी, ‘माझ्याशी मराठीत संवाद साधा’, अशी विनंती केल्याचे सांगितले जाते. यानंतर दोघांमध्ये शाब्दिक चकमक झाली. वाद चिघळल्याने हेगडे यांना अंधेरी स्थानकात उतरवून आरपीएफ कार्यालयात नेण्यात आले. तेथे त्यांना सुमारे दोन तास बसवून ठेवल्याचा आरोप आहे. सरकारी कामात अडथळा आणल्याचा ठपका ठेवून त्यांच्यावर ही कारवाई झाली.
वाद वाढल्यानंतर मराठी तिकीट तपासनीस साईप्रसाद सावंत यांनी मराठी बाराखडी म्हणून दाखवत प्रवाशाला रेल्वेचे नियम समजावून सांगितले, असे व्हायरल झालेल्या व्हिडीओमध्ये दिसते. मराठीत संवाद साधण्याची मागणी करणे हा गुन्हा नाही. त्याला सरकारी कामात अडथळा कसे म्हणता येईल? असा सवाल मराठी एकीकरण समितीचे अध्यक्ष गोवर्धन देशमुख यांनी केला.
नेमकं काय घडलं?
या प्रकरणात प्राथमिक चौकशी रेल्वेकडून सुरू करण्यात आली आहे. या घटनेचा व्हिडीओ सोशल मीडियावर व्हायरल झाला आहे. या व्हिडीओमध्ये रेल्वे कर्मचारी आणि प्रवाशामध्ये बाचाबाची झाल्याचे दिसून येत आहे. या व्हिडीओमध्ये प्रवाशाने एका अमराठी रेल्वे कर्मचाऱ्याकडे मराठीत संवाद साधण्याची मागणी केल्यानंतर वाद सुरू झाल्याचं दिसून येत आहे. त्यानंतर दुसरा टीसी यामध्ये हस्तक्षेप करत वाद घालत असल्याचं दिसत आहे. “तुम्ही हिंदी, इंग्लिशमध्ये व्हॉट्सअॅप का वापरता? मी मराठी आहे. माझ्याशी बोला,” असं म्हणत वाद सुरू केला. या घटनेनंतर प्रवासी आणि टीसी या दोघांनीही अंधेरी रेल्वे पोलिसांकडे कारवाईची मागणी केली होती.
पश्चिम रेल्वेकडून चौकशी सुरू
दरम्यान, या प्रकरणावर पश्चिम रेल्वेने आपली पहिली प्रतिक्रिया दिली आहे. “आम्हाला या घटनेची कल्पना आहे आणि व्हायरल व्हिडिओही आम्ही पाहिला आहे. मिळालेल्या माहितीनुसार, दोघांनीही अंधेरी रेल्वे पोलिसांकडे कारवाईची मागणी केली आहे. आम्ही सध्या व्हिडिओ आणि या संपूर्ण घटनेचा तपास करत आहोत. प्राथमिक तपास पूर्ण झाल्यानंतर आम्ही योग्य ती कारवाई करून,” अशी माहिती त्यांनी दिली आहे.
या प्रकरणात नेमकी चूक कुणाची आहे? संबंधित टीसीची, प्रवाशाची की दोघांचीही? अशा घटनांची पुनरावृत्ती होऊ नये, यासाठी रेल्वे प्रशासनाने कोणती कारवाई करावी, तुमचं मत कमेंटमध्ये नक्की सांगा.
लेखकाबद्दलसानिया कदमसानिया कदम या सध्या ‘मटा ऑनलाईन’मध्ये गेल्या सहा महिन्यांपासून कन्सल्टंट पदावर कार्यरत आहेत. २०२५ मध्ये बॅचलर्सचे शिक्षण पूर्ण करून त्यांनी नुकताच पत्रकारितेच्या क्षेत्रात प्रवेश केला आहे. लोकल बातम्या, लाइव्ह ब्लॉग कव्हरेज, गुन्हेगारी, आंतरराष्ट्रीय घडामोडी तसेच इन्फ्रास्ट्रक्चर व नागरी विकासाशी संबंधित बातम्यांमध्ये त्यांना विशेष रस आहे.
पत्रकारितेतील व्यावसायिक कामाची ही त्यांची पहिलीच वेळ असली, तरी त्यांच्या पत्रकारितेच्या प्रवासाची सुरुवात महाराष्ट्र टाइम्स प्रिंटमधून झाली. २०२४ मध्ये मुलुंड वाणिज्य महाविद्यालयातून बीएमएमचे शिक्षण घेत असताना प्राध्यापकांकडून त्यांची कॉलेज क्लब रिपोर्टर म्हणून नियुक्ती झाली आणि तेव्हाच ‘मटा’शी त्यांचा पहिला संबंध जोडला गेला.
यानंतर त्यांनी अनेक महिन्यांपर्यंत महाराष्ट्र टाइम्सच्या ‘मुंबई टाइम्स’ पुरवणीसाठी लेखन केले. कॉलेज विद्यार्थ्यांच्या दैनंदिन समस्या, सोशल मीडियावरील ट्रेंड्स तसेच एआयच्या वाढत्या प्रभावावर त्यांनी अनेक लेख लिहिले. सोशल मीडियावर गाजलेल्या ‘घिबली आर्ट’ ट्रेंडवर तसेच परीक्षेच्या काळात विद्यार्थ्यांच्या आयुष्यात वाढत्या एआयच्या वापराबाबत लिहिलेल्या लेखांचे विशेष कौतुक झाले. या काळात महाराष्ट्र टाइम्स प्रिंटच्या विविध कार्यक्रमांमध्ये सहभागी होत त्यांनी वृत्तांकनासाठीही हातभार लावला. २०२५ मधील ‘माय मराठी कला संगम’ तसेच महाराष्ट्र टाइम्सच्या ‘शोध युवा प्रतिमेचा’ या विशेष कार्यक्रमांचे त्यांनी वृत्तांकन केले. विद्यार्थ्यांशी आणि नव्या पिढीशी जोडून घेणाऱ्या, त्यांच्या दृष्टिकोनातून बातम्या मांडण्याचा त्यांचा नेहमीच प्रयत्न राहिला.
२०२५ मध्ये बीएमएमचे शिक्षण पूर्ण केल्यानंतर त्यांनी के.सी. महाविद्यालयातून एमए इन जर्नलिझमला प्रवेश घेतला आणि त्याचवेळी ‘मटा ऑनलाईन’मध्ये काम सुरू केले. येथे त्यांनी लोकल बातम्या, लाइव्ह ब्लॉग अपडेट्स, इन्फ्रास्ट्रक्चर व विकासकामे, तसेच सरकारी धोरणे यांवर विशेष प्राविण्य मिळवले.
लहानपणापासूनच मराठी आणि इंग्रजी भाषेत वाचन-लेखनाची आवड असल्याने इंग्रजी भाषेवर त्यांचे विशेष प्रभुत्व आहे. त्यामुळे इंग्रजीतील गुंतागुंतीच्या बातम्या मराठी वाचकांसाठी सोप्या, समजण्यासारख्या भाषेत मांडण्याचा त्यांचा सातत्यपूर्ण प्रयत्न असतो. डिग्रीपर्यंतचं शिक्षण इंग्रजी माध्यमातून केलं असून संपूर्ण महाविद्यालयात प्रथम क्रमांक पटकावला. शेवटच्या वर्षी, न्यूजरूम नावाच्या प्रोजेक्टसाठी एका वृत्तपत्राच्या संपादकांची मुलाखत घेणं आवश्यक होतं. त्यावेळी, मुंबई चौफेरचे संपादक श्री. प्रफुल्ल फडके यांची मुलाखत घेतली. या मुलाखती दरम्यान त्यांनी आपल्या 30 वर्षांच्या मराठी भाषेतील पत्रकारीतेच्या अनुभवाबद्दल सांगितलं. त्यावेळी मराठी माध्यमातून पत्रकारिता करण्याची आवड निर्माण झाली. नंतर महाराष्ट्र टाईम्स प्रिंटमधल्या अनुभवामुळे ही आवड आणखी वाढली.… आणखी वाचा
