पुण्यात गेल्या काही तासांपासून सुरू असलेल्या मुसळधार पावसाचा फटका आता रस्ते आणि रेल्वे वाहतुकीपाठोपाठ थेट मेट्रो सेवेलाही बसल्याचे समोर आले आहे. पुण्यातील अत्यंत वर्दळीचे आणि नुकतेच प्रवाशांच्या सेवेत दाखल झालेले ‘स्वारगेट भूमिगत मेट्रो स्थानक’ पहिल्
.
मुसळधार पावसामुळे स्वारगेट मेट्रो स्थानकाच्या छताला आणि अंतर्गत भिंतींना मोठी गळती लागली आहे. छतातून पडणारे पाणी संपूर्ण स्थानकात पसरून प्रवाशांचा पाय घसरू नये, यासाठी प्रशासनाने घाईघाईने पाणी पडणाऱ्या ठिकाणी प्लास्टिकच्या बादल्या मांडल्या आहेत.
प्लॅटफॉर्मवर ठिकठिकाणी पाणी साचल्यामुळे प्रवाशांना अत्यंत सांभाळून चालावे लागत आहे. त्यातच मध्येच ठेवलेल्या या बादल्यांमुळे प्रवाशांच्या येण्या-जाण्याच्या मार्गात मोठा अडथळा निर्माण झाला असून, ऐन गर्दीच्या वेळी प्रवाशांचे हाल होत आहेत.
मेट्रो स्थानकाच्या कामाच्या गुणवत्तेवर प्रश्न
स्वारगेट हे पुण्यातील सर्वात प्रमुख वाहतूक केंद्र आहे. हे भूमिगत स्थानक उभारण्यासाठी शासनाने शेकडो कोटी रुपयांचा निधी खर्च केला आहे. अत्यंत आधुनिक आणि अत्याधुनिक तंत्रज्ञानाचा वापर करून हे स्थानक बांधल्याचा दावा महामेट्रोकडून केला जात होता. मात्र, पहिल्याच दमदार पावसात स्थानकाची ही दुरवस्था झाल्याने या बांधकामाच्या दर्जावर आणि गुणवत्तेवर मोठे प्रश्नचिन्ह उपस्थित केले जात आहे.
प्रवाशांकडून संताप व्यक्त
या प्रकारावर एका मेट्रो प्रवाशाने संतप्त प्रतिक्रिया दिली. “शेकडो कोटी रुपये खर्च करून जर पहिल्याच पावसात हे हायटेक स्थानक गळणार असेल, तर या बांधकामात नक्कीच काहीतरी गडबड आहे. महामेट्रोच्या या निष्काळजीपणामुळे प्रवाशांच्या सुरक्षेचा गंभीर प्रश्न निर्माण झाला असून या संपूर्ण कामाची उच्चस्तरीय चौकशी झालीच पाहिजे,” असे मेट्रो प्रवासी म्हणाला.
सोशल मीडियावर पुणेकरांकडून महामेट्रोची खिल्ली
इतका भव्य आणि महत्त्वाकांक्षी प्रकल्प उभारताना वॉटरप्रूफिंगचे काम योग्य रीतीने का केले गेले नाही? असा थेट सवाल आता पुणेकर विचारत आहेत. या प्रकारानंतर सोशल मीडियावर स्वारगेट मेट्रो स्थानकाचे बादल्या ठेवलेले फोटो आणि व्हिडिओ तुफान व्हायरल होत असून, पुणेकरांनी महामेट्रोच्या ‘कारभाराची’ चांगलीच फिरकी घेतली आहे. आता या गंभीर गळतीवर महामेट्रो प्रशासन काय तातडीची उपाययोजना करते, याकडे सर्वांचे लक्ष लागले आहे.
हे ही वाचा…
इंद्रायणी पुरामुळे आळंदी पालखी सोहळ्यावर निर्बंध:केवळ मर्यादित भाविकांनाच मंदिरात प्रवेश, 8 जुलैला सोहळा
इंद्रायणी नदीला आलेल्या पुरामुळे यंदाचा श्री संत ज्ञानेश्वर महाराज पालखी प्रस्थान सोहळा अत्यंत मर्यादित भाविकांच्या उपस्थितीत पार पडणार आहे. ८ जुलै रोजी दुपारी ३ वाजता आळंदी येथील श्री संत ज्ञानेश्वर महाराज संजीवन समाधी मंदिरात हा सोहळा साधेपणाने आणि कडक नियमांच्या अधीन राहून आयोजित केला जाईल. संततधार पाऊस आणि पूरपरिस्थिती लक्षात घेता प्रशासनाने सुरक्षेच्या कारणास्तव हा निर्णय घेतला आहे. सविस्तर वाचा…
पुण्यात थरारक सुटका, VIDEO:पाण्याने भरलेल्या भुयारी मार्गात शिरला टेम्पो, प्रवाहात वाहून जाऊ लागला; वाहतूक पोलिसांनी वाचवले चालकाचे प्राण
मुसळधार पावसामुळे पुणे शहरातील अनेक सखल भाग जलमय झाले असताना सोमवारी दुपारी बोपोडी परिसरात थरारक घटना घडली. पाण्याने भरलेल्या भुयारी मार्गात एक टेम्पो शिरल्यानंतर तो जोरदार प्रवाहात वाहून जाऊ लागला. मात्र, तेथे बंदोबस्तावर असलेल्या वाहतूक पोलिसांनी प्रसंगावधान दाखवत तातडीने बचावकार्य हाती घेतल्याने चालकाचे प्राण वाचले. सविस्तर वाचा…
