होमगार्ड उजळणी प्रशिक्षणाचा समारोप, तोटेवाड यांचे मार्गदर्शन:जवानांना कर्तव्यनिष्ठा, शिस्त आणि सेवाभावाचा संदेश दिला

काँग्रेसनगर येथील होमगार्ड प्रशिक्षण केंद्रात सुरू असलेल्या उजळणी प्रशिक्षण शिबिराचा समारोप गुरुवारी, ६ ऑगस्ट रोजी उत्साहात पार पडला. यावेळी जिल्हा समादेशक तथा अप्पर पोलीस अधीक्षक दत्ता तोटेवाड यांनी होमगार्ड जवानांना कर्तव्यनिष्ठा, शिस्त आणि सेवाभावाचा संदेश दिला. होमगार्ड ही केवळ एक स्वयंसेवी संघटना नसून, संकटाच्या प्रत्येक क्षणी नागरिकांच्या मदतीसाठी धावून जाणारी विश्वासार्ह शक्ती आहे, असे तोटेवाड यांनी नमूद केले. नैसर्गिक आपत्ती, कायदा व सुव्यवस्था, निवडणुका, धार्मिक उत्सव, वाहतूक नियंत्रण आणि विविध शासकीय कामांमध्ये होमगार्ड जवानांचे योगदान अत्यंत महत्त्वाचे असल्याचे त्यांनी सांगितले. शिस्त, प्रामाणिकपणा, सेवाभाव आणि राष्ट्रनिष्ठा हीच होमगार्डची खरी ओळख असून, प्रत्येक जवानाने ही मूल्ये आपल्या सेवेत जपली पाहिजेत, असे आवाहन तोटेवाड यांनी केले. केंद्रनायक राम पिंजरकर यांच्या मार्गदर्शनाखाली प्रशिक्षणार्थी होमगार्ड जवानांनी आत्मसात केलेल्या विविध कौशल्यांचे प्रात्यक्षिकही यावेळी सादर करण्यात आले. त्यांच्या शिस्तबद्ध संचलनाने उपस्थितांची दाद मिळवली. प्रशिक्षणातून मिळालेल्या ज्ञानाचा प्रत्यक्ष सेवेत प्रभावी उपयोग करून समाजाच्या सुरक्षेसाठी सदैव तत्पर राहणे हीच खरी देशसेवा आहे, असे तोटेवाड यांनी पुढे सांगितले. प्रशिक्षणादरम्यान घेतलेल्या प्रत्येक विषयाचे महत्त्व अधोरेखित करत सातत्याने सराव, शारीरिक तंदुरुस्ती आणि मानसिक सज्जता कायम ठेवण्याचे आवाहनही त्यांनी केले. या प्रशिक्षणात केंद्रनायक राम पिंजरकर यांच्या मार्गदर्शनाखाली प्रशिक्षक मधुसूदन राऊत, सागर शहाकार, कपील धवणे, प्रवीण पातुरकर आणि सुधाकर रामटेके यांनी अत्यंत मेहनतीने, संयमाने आणि प्रात्यक्षिकांसह प्रशिक्षण दिले. अशा प्रकारच्या प्रशिक्षणामुळे होमगार्ड दल अधिक सक्षम, शिस्तप्रिय आणि समाजाभिमुख बनत असल्याची भावना उपस्थित मान्यवरांनी व्यक्त केली. या उजळणी प्रशिक्षणाचा मुख्य उद्देश होमगार्ड जवानांच्या अंगी असलेली कर्तव्यदक्षता अधिक बळकट करणे, शारीरिक व मानसिक क्षमता वाढविणे, आपत्कालीन परिस्थितीत प्रभावीपणे कार्य करण्यासाठी त्यांना सक्षम बनविणे तसेच कायदा व सुव्यवस्था राखण्यामध्ये त्यांची भूमिका अधिक प्रभावी करणे हा होता. प्रशिक्षणादरम्यान शिस्त, वेळेचे नियोजन, कर्तव्यनिष्ठा, नागरिकांची सुरक्षा, आपत्ती व्यवस्थापन (पूर, आग, अपघात यांसारख्या संकटांमध्ये बचावकार्य), प्रथमोपचार, रायफल ड्रिल, संचलन, सलामी, शारीरिक तंदुरुस्ती, आपत्कालीन प्रतिसाद, गर्दी नियंत्रण, सार्वजनिक सुरक्षेचे विविध पैलू तसेच पोलीस प्रशासनाला सहाय्य करण्याच्या पद्धतींचे सखोल प्रशिक्षण देण्यात आले.



Source link