Gold Price Outlook; होर्मुझ संकटात सोनं-चांदीचे मार्केट डाऊन, तरी खरेदीदार नाही, गुंतवणूकदार सावध; गोल्डवर डॉलर का वरचढ ठरला?

साल 2026 ची सुरुवात सोन्यासाठी सकारात्मक राहिली. डिसेंबर 2025 ते 29 जानेवारी 2026 या काळात सोन्याच्या दरांनी उंचच उंच उभारी घेतली आणि सर्वांनाच आश्चर्याचा धक्का दिला. अवघ्या 29 दिवसांत सोन्याचा दर 1.33 लाखांवरून 1.76 लाखांपर्यंत उसळला, पण त्यानंतर सोन्याच्या दरवाढीला घसरणीचे ग्रहण लागले आणि मग अद्यापही उच्चांकानजीक पोहचू शकलेले नाही.

फेब्रुवारीच्या शेवटपासून पश्चिम आशियात इराण युद्धाचा भडका उडाल्यापासून सोन्याची झळाळी अंदाजे 37000 रुपयांनी उतरली. अशा परिस्थितीत, लग्नसराई आणि सणासुदीच्या काळात सोने खरेदीदारांच्या मनात प्रश्न उपस्थित होत आहे की सोन्याचा दर आणखी घसरणार की पुन्हा वाढू लागतील? त्याचबरोबर, युद्ध सुरू झाल्यापासून सोन्याचे दर इतके कसे घसरले हाही प्रश्न आहे. जे सोने सहसा युद्ध किंवा तणावात महाग होते, यावेळी उलट दिशेने का जात आहे? रशिया-युक्रेन युद्धादरम्यान सोन्याची स्थिती सर्वांनी पाहिली, पण आखाती युद्धात सोन्याचा रंग कसा बदलला?

29 जानेवारी 2026 रोजी 24 कॅरेट सोन्याचा दर 1.79 लाख रुपये होता, जो ऑगस्ट महिन्याच्या पहिल्या आठवड्यात 1.42 लाखांवर घसरला आहे. अशाप्रकारे, सोन्याची किंमत या सहा महिन्यांत 37000 रुपयांनी कमी झाली असून एक किलो चांदीचा भाव 3.89 लाखांवरून 2.19 लाख रुपये किलोवर घसरला. अशाप्रकारे, चांदी आपल्या ऑल-टाइम उच्चांकावरून 1.70 लाखांनी स्वस्त झाली.

मध्यपूर्वेतील युद्धामुळे क्रूडच्या दरात भडका उडाला आणि डॉलरही मजबूत झाला. सतत मजबूत होणारा अमेरिकी डॉलर आणि ट्रेझरी बाँड यील्डमुळे सोन्याच्या दरवाढीला लगाम लागली. जागतिक बाजारात सोन्याच्या किमती सातत्याने घसरत असून यामुळे MCX आणि सराफा बाजारावर दबाव येत आहे. तसेच फेडरल रिझर्व्हने पुन्हा एकदा व्याजदर वाढवले नसून फेडच्या निर्णयामुळे सोन्यावरील दबाव आणखी वाढला असता आणि घसरण आणखी खोलवर गेली असती.

फेडरल रिझर्व्हने व्याजदर अपरिवर्तित ठेवले असून महागाईबाबत कठोर भूमिका, मजबूत कामगार बाजार आणि वाढत्या तेलाच्या किमती पाहता नजीकच्या भविष्यात दर कपातीची शक्यता कमी आहे. याव्यतिरिक्त इराण युद्धामुळे होर्मुझ सामुद्रधुनीही ठप्प झाली आहे. हुती बंडखोरांनी लाल समुद्रात तणाव वाढवला, ज्यामुळे भू-राजकीय तणाव आणखी वाढला असून आणखी युद्ध अद्याप संपलेले नाही आणि अमेरिका व इराण यांच्यात लवकरच युद्धविराम झाला नाही, तर कमोडिटी बाजारातील तणाव वाढण्याची शक्यता आहे. क्रूडच्या दरांवरील दबाव वाढल्यास गुंतवणूकदार सोन्यापासून आणखी दूर जाऊ शकतात. पण युद्धविराम, ऊर्जा किमतींवरील दबाव कमी होणे यांसाख्या हालचालींमुळे गुंतवणूकदार सोने आणि चांदीकडे वळू लागतील ज्यामुळे सोन्याच्या किमतींना अतिरिक्त आधार मिळेल.

सोन्या-चांदीची किंमत प्रचंड घसरली आहे. सोनं 37000 रुपये तर चांदीची किंमत 1.70 लाखांनी कमी झाली असून आता सोन्यातील गुंतवणूक वाढणार का? हाच मोठा प्रश्न सध्या गुंतवणूकदारांच्या मनात घोंघावत आहे. या वर्षाच्या अखेरपर्यंत सोन्याचा भाव 1.60 लाख आणि चांदीचा भाव 2.80 लाख रुपये किलोपर्यंत वाढण्याचा एक्सपर्टचा अंदाज आहे. ऑगस्ट 2026 मध्ये सोन्याचा टेक्निकल चार्ट पाहिल्यास मंदीचा कल दिसत आहे.