Nagpur Crime News : नागपुरात १७ वर्षीय उदयोन्मुख महिला क्रिकेटपटूने जीवन संपवल्याची धक्कादायक घटना घडली. सुसाइड नोटमध्ये VCA निवड प्रक्रियेचा उल्लेख आढळला असून, आत्महत्येमागील नेमके कारण शोधण्यासाठी पोलिस सर्व बाजूंनी तपास करत आहेत.
बुधवारी पहाटे साडेपाचच्या सुमारास लक्ष्मीनगर परिसरातील जैन मंदिराजवळील उमालक्ष्मी अपार्टमेंटमध्ये राहणाऱ्या अदिती मोरेश्वर चौकांडे (वय १७) हिने राहत्या घरी गळफास घेऊन आत्महत्या केल्याचा प्रकार उघडकीस आला. अदिती मूळची अकोला जिल्ह्यातील असून, गेल्या दोन वर्षांपासून ती आईसोबत नागपुरात राहत होती. क्रिकेटमध्ये करिअर घडवण्यासाठी ती प्रसिद्ध सुर्वे क्रिकेट अकादमीत नियमित सराव करत होती. तिचे राष्ट्रीय आणि आंतरराष्ट्रीय स्तरावर क्रिकेट खेळण्याचे स्वप्न होते. तिचा भाऊदेखील क्रिकेटपटू आहे.
मिळालेल्या माहितीनुसार, नुकत्याच झालेल्या विदर्भ क्रिकेट असोसिएशनच्या निवड प्रक्रियेत अदितीची निवड झाली नव्हती. त्यानंतर ती निराश आणि मानसिक तणावात असल्याचे तिच्या जवळच्या व्यक्तींनी सांगितल्याची माहिती पोलिस सूत्रांकडून मिळाली आहे. घटनास्थळावरून जप्त करण्यात आलेल्या सुसाइड नोटमध्येही निवड न झाल्याचा उल्लेख असल्याचे पोलिसांनी सांगितले. घटनेची माहिती मिळताच बजाजनगर पोलिसांनी तातडीने घटनास्थळी धाव घेतली. पंचनामा करून मृतदेह शवविच्छेदनासाठी शासकीय रुग्णालयात पाठविण्यात आला. या प्रकरणी आकस्मिक मृत्यूची नोंद करण्यात आली असून, सुसाइड नोट, कुटुंबीयांचे जबाब, निवड प्रक्रियेसंदर्भातील माहिती आणि इतर सर्व बाबींची चौकशी सुरू आहे. तपास पूर्ण झाल्यानंतरच आत्महत्येमागील नेमके कारण स्पष्ट होईल, असे पोलिसांनी सांगितले.
ही घटना केवळ एका खेळाडूच्या मृत्यूपुरती मर्यादित नसून स्पर्धात्मक क्रीडा क्षेत्रातील वाढता मानसिक ताण, अपेक्षांचे ओझे आणि अपयश स्वीकारण्याच्या आव्हानांवरही गंभीर प्रश्न उपस्थित करणारी ठरत आहे. निवड किंवा अपयश हा क्रीडा प्रवासाचा एक भाग असला तरी अशा परिस्थितीत खेळाडूंना भावनिक आधार, समुपदेशन आणि कुटुंबीयांचा पाठिंबा मिळणे तितकेच महत्त्वाचे आहे. दरम्यान, या दुर्दैवी घटनेमुळे नागपूरच्या क्रीडा वर्तुळात हळहळ व्यक्त केली जात आहे.
लेखकाबद्दलसुनिल लाटेसुनिल प्रभाकर लाटे हे ‘महाराष्ट्र टाइम्स ऑनलाइन’मध्ये कन्सल्टंट या पदावर कार्यरत आहेत. ते गेल्या तीन वर्षांपासून पत्रकारिता क्षेत्रात सक्रिय आहेत. महाराष्ट्र टाइम्स ऑनलाइनमध्ये ते स्थानिक बातम्या, लाइव्ह ब्लॉग कव्हरेज, गुन्हेगारी, राजकारण, देश-विदेश, सरकारी योजना, तसेच इन्फ्रास्ट्रक्चर आणि नागरी विकासाशी संबंधित विषयांवर नियमित लेखन करतात. २०२२ मध्ये पत्रकारितेचे शिक्षण पूर्ण केल्यानंतर त्यांनी आपल्या कारकिर्दीची सुरुवात ‘लोकसत्ता ऑनलाइन’ (मुंबई) येथून केली.सुनिल यांनी राजकारण, मनोरंजन, क्रीडा आणि गुन्हेगारी अशा विविध विषयांचे वार्तांकन व विश्लेषण प्रभावीपणे केले आहे. हायपरलोकल न्यूज, क्राईम रिपोर्टिंग, राजकारण आणि चालू घडामोडींवरील नाविन्यपूर्ण डिजिटल कंटेंट लिहिण्याचा त्यांना दांडगा अनुभव आहे. त्यांनी डॉ. बाबासाहेब आंबेडकर मराठवाडा विद्यापीठाच्या वृत्तपत्रविद्या विभागातून पत्रकारितेतील पदव्युत्तर शिक्षण (MA) पूर्ण केले आहे. शिक्षण घेत असतानाच त्यांनी ‘दैनिक दिव्य मराठी’ आणि ‘दैनिक पुण्य नगरी’ यांसारख्या नामांकित वृत्तपत्रांसाठी बातम्या लिहून प्रत्यक्ष कामाचा अनुभव घेतला. यादरम्यान त्यांनी प्रामुख्याने शिक्षण क्षेत्रातील बातम्यांचे कव्हरेज केले.अचूक आणि प्रभावी डिजिटल रिपोर्टिंग ही सुनिल यांची खासियत आहे. गेल्या तीन वर्षांत त्यांनी उत्कृष्ट ‘न्यूज सेन्स’ आणि ‘ब्रेकिंग न्यूज’ कव्हरेजचे संपादन कौशल्य विकसित केले आहे. महाराष्ट्र टाइम्स ऑनलाइनमध्ये काम करताना वेगवान अपडेट्स देणे आणि डिजिटल वाचकांना समजेल अशा सोप्या शैलीत घडामोडींची मांडणी करणे, यात त्यांनी प्राविण्य मिळवले आहे. पत्रकारितेतील नवनवीन तंत्रे शिकून स्वतःला अधिक सक्षम बनवण्यावर त्यांचा सतत भर असतो.पत्रकारितेसोबतच त्यांना फोटोग्राफी, व्हिडिओ एडिटिंग आणि ग्राफिक्स डिझाइनची विशेष आवड असून, जाहिरात क्षेत्रातही त्यांनी काम केले आहे. सर्जनशील लेखनाची ओढ असलेल्या सुनिल यांनी काही लघुपटांचे दिग्दर्शन आणि पटकथा लेखनही केले आहे. तसेच, संगीत आणि गायन क्षेत्रातही त्यांना विशेष रुची आहे.… आणखी वाचा
