मेस्सी, लिसँड्रो मार्टिनेझकडून गोल, आता सामना इजिप्तशी
वृत्तसंस्था, मियामी गार्डन्स, फ्लोरिडा : लायोनेल मेस्सीने आपल्या कपाळावरचा घाम पुसला आणि सुटकेचा नि:श्वास टाकला. त्याच्या अर्जेंटिनाच्या सहकाऱ्यांनीही तसेच केले. कारण केप वर्देविऊद्धचा अपेक्षित नव्हता इतका रोमांचक आणि अविस्मरणीय झालेला विश्वचषक सामना संपला होता आणि पराभवाच्या उंबरठ्यावर पोहोचल्यानंतर गतविजेत्यांनी 3-2 असा विजय मिळवला होता.
111 व्या मिनिटाला क्रिस्तियान रोमेरोने हाणलेला ’हेडर’ केप वर्देच्या दिनी बोर्जेसला लागून चेंडूने दिशा बदलल्यामुळे अर्जेंटिनाला मिळालेली आघाडी ‘स्वयंगोल’ म्हणून नोंदवली गेली. मेस्सीने निर्धारित वेळेच्या सुऊवातीलाच गोल केला. हा त्याच्या कारकिर्दीतील 20 वा विश्वचषक गोल आहे, ज्याने त्याचाच विक्रम अधिक भक्कम केला. त्यानंतर 92 व्या मिनिटाला लिसँड्रो मार्टिनेझने गोल करून अर्जेंटिनाला 2-1 अशी आघाडी मिळवून दिली.
केप वर्देसाठी सिडनी लोपेस काब्राल आणि डेरॉय डुआर्टे यांनी गोल केले. हे दोन्ही गोल बरोबरी साधणारे होते, ज्यामुळे दक्षिण फ्लोरिडातील अर्जेंटिनाचे समर्थक अवाक झाले. काब्रालचा गोल 103 व्या मिनिटाला गोलरक्षक एमिलियानो मार्टिनेझला चकवून उजव्या पायाने मारलेल्या वळणदार फटक्यावर झाला. हा गोल अत्यंत रोमांचक ठरलेल्या या सामन्याला आणखी अविश्वसनीय वळण देणारा ठरला. यामुळे सामना 2-2 असा बरोबरीत आला आणि पेनल्टी शूटआउटमध्ये मेस्सीचा सामना केप वर्देचा उत्कृष्ट गोलरक्षक वोजिन्याशी होण्याची शक्यता निर्माण झाली.
पण आठ मिनिटांनंतर अर्जेंटिनाने पुन्हा आघाडी घेतली आणि ती टिकवून ठेवत पुढील फेरीत प्रवेश केला. आता मंगळवारी अटलांटा येथे त्यांचा सामना इजिप्तशी होईल. मेस्सीने या सामन्यातून आपल्या खात्यात आणखी एका शानदार गोलची भर घातली. मार्टिनेझने हवेतून दिलेल्या पासवर मेस्सीने अचूक वेळेत धाव घेत केप वर्देच्या बचावपटूंच्या मागे जागा शोधली. त्यानंतर चेंडूला हलकासा स्पर्श करून तो थेट गोलजाळीच्या वरच्या भागात सारला आणि 29 व्या मिनिटाला संघाला 1-0 अशी आघाडी मिळवून दिली.
मेस्सीने केलेल्या गोलांची संख्या सातवर
या स्पर्धेत मेस्सीचे आता सात गोल झाले आहेत. या वर्षीच्या विश्वचषकात सर्वाधिक गोल करणाऱ्या खेळाडूला मिळणाऱ्या ‘गोल्डन बूट’च्या शर्यतीत तो फ्रान्सच्या किलियन एमबाप्पेपेक्षा एका गोलने पुढे आहे. तसेच त्याने आपला विश्वचषकातील विक्रम आणखी सुधारला असून कारकिर्दीतील एकूण गोलांच्या यादीत तो एमबाप्पेपेक्षा दोन गोलांनी पुढे आहे. सलग आठ सामन्यांत गोल करण्याच्या आपल्या विक्रमी मालिकेत त्याने एकूण 12 गोल केले आहेत.
सामन्यातील गोल करण्याची पहिली संधीही मेस्सीला मिळाली होती. 15 व्या मिनिटाला त्याने मारलेला फटका गोलपोस्टच्या समोरून वेगाने गेला खरा, पण तो उजव्या खांबाच्या बाहेरून गेला. खाली पाडल्यानंतर तीन मिनिटांनंतर त्याला 25 यार्डांवरून ‘फ्री-किक’ मिळाली, जी गोलरक्षक वोजिन्याने सहजपणे रोखली. जेव्हा जेव्हा संघाला गरज होती तेव्हा तेव्हा वोजिन्याने अप्रतिम बचाव करून दाखवला.
केपे वर्देकडून जोरदार झुंज
केप वर्देने निर्धारित वेळेत आणि पुन्हा अतिरिक्त वेळेत बरोबरी साधली, पण अर्जेंटिनाच्या तिसऱ्या गोलला ते प्रत्युत्तर देऊ शकले नाहीत आणि 3-2 असा विजय मिळवून अर्जेंटिनाचा संघ 16 संघांच्या फेरीत पोहोचला. पराभव पत्करावा लागला असला, तरी आफ्रिकेच्या पश्चिम किनाऱ्याजवळील एक छोटे बेट राष्ट्र असलेल्या केप वर्देची कामगिरी या किंवा कोणत्याही विश्वचषकातील सर्वांत उल्लेखनीय कथांपैकी एक म्हणून कायम राहील.
