Chhatrapati Sambhajinagar News: स्मार्ट सिटी कार्यालयात आयोजित विभागीय क्रीडा संकुल समितीची बैठक पार पडली.यावेळी समितीचे उपाध्यक्ष जी. श्रीकांत यांनी विभागीय क्रीडा संकुलामध्ये उत्तम सुविधा द्या असे निर्देश दिले.
त्याचबरोबर नव्याने सुरु करण्यात येणाऱ्या सिंथेटीक ट्रॅक वं फुटबॉल मैदानाच्या वापरासाठी प्रमाणित कार्य पद्धती तयार करण्यात यावी व फक्त खेळाडूंकरिताच ट्रॅक व फुटबॉल मैदान या सुविधा उपलब्ध करून देण्यात याव्यात, अशाही सूचना विभागीय आयुक्तांनी दिल्या.
राष्ट्रीय व आंतरराष्ट्रीय दर्जाचे प्रशिक्षण केंद्र
‘विभागीय क्रीडा संकुल हे राष्ट्रीय व आंतरराष्ट्रीय दर्जाचे प्रशिक्षण केंद्र बनविण्यासाठी आवश्यक सुविधा आणि सुरक्षितता उपलब्ध करून द्या,’ असे निर्देश विभागीय आयुक्त तथा विभागीय क्रीडा संकुल समितीचे उपाध्यक्ष जी. श्रीकांत यांनी दिले.
विभागीय क्रीडा संकुल समितीची बैठक
स्मार्ट सिटी कार्यालयात आयोजित विभागीय क्रीडा संकुल समितीच्या बैठकीत ते बोलत होते. यावेळी जिल्हाधिकारी विनय गौडा जी.सी, जिल्हा परिषदेच्या मुख्य कार्यकारी अधिकारी मिन्नू पी. एम., विभागीय क्रीडा संकुलचे उपसंचालक तथा समितीचे सदस्य सचिव शेखर पाटील, संबंधित विभागांचे अधिकारी आणि कंत्राटदार कंपनीचे प्रतिनिधी उपस्थित होते.
सिंथेटिक ट्रॅकचे उद्घाटन
जी. श्रीकांत यांनी सांगितले, ‘मुख्यमंत्री यांच्या विकसित महाराष्ट्र धोरणानुसार मराठवाड्यात उत्कृष्ट खेळाडू घडविण्यासाठी क्रीडा संकुलात आधुनिक आणि दर्जेदार सुविधा उपलब्ध करून देणे आवश्यक आहे. राष्ट्रीय व आंतरराष्ट्रीय स्पर्धांसाठी खेळाडूंना सक्षम बनविण्यासाठी सर्व आवश्यक पायाभूत सुविधा उभारण्यावर भर देण्यात यावा.’ मराठवाडा मुक्तिसंग्राम दिनानिमित्त विभागीय क्रीडा संकुलातील ४०० मीटर सिंथेटिक ट्रॅकचे उद्घाटन मुख्यमंत्री देवेंद्र फडणवीस यांच्या हस्ते होणार असून त्याच कालावधीत जिल्हास्तरीय क्रीडा स्पर्धांचे आयोजन करण्याचे निर्देशही त्यांनी दिले.
कामे तातडीने पूर्ण करण्याचे निर्देश
ट्रॅकचे काम निर्धारित वेळेत पूर्ण करण्यासह विभागीय निपुणता केंद्र, लॉन टेनिस, कुस्ती, बॅडमिंटन, बॉक्सिंगसाठी इनडोअर हॉल, बास्केटबॉल, फुटबॉलसाठी मैदाने, खेळाडूंची निवासी व्यवस्था, दर्जेदार क्रीडा साहित्य, रंगरंगोटी, विद्युत दुरुस्ती, स्वच्छतागृहांची सुधारणा तसेच ‘मिशन लक्षवेध’ अंतर्गत वसतिगृहांच्या दुरुस्तीची कामे तातडीने पूर्ण करण्याचे निर्देश त्यांनी दिले. या कामांसाठी आवश्यक निधी मिळावा यासाठी जिल्हा नियोजन समितीकडे प्रस्ताव सादर करण्यासही सांगितले.
प्रलंबित कामे तातडीने पूर्ण करून विविध स्पर्धांचे यशस्वी आयोजन
प्रलंबित कामे तातडीने पूर्ण करून क्रीडा संकुलात विविध स्पर्धांचे यशस्वी आयोजन, खेळाडूंसाठी दर्जेदार निवासी व्यवस्था, आरोग्य सुविधा आणि स्वच्छता करण्यावरही त्यांनी भर दिला. त्याचप्रमाणे खेळाडूंच्या सुरक्षेच्या दृष्टीने क्रीडा संकुल परिसर आणि भागांतील भटक्या कुत्र्यांचा तातडीने बंदोबस्त करण्याचे निर्देश देण्यात आले. कुत्र्यांना खाऊ घालणाऱ्यांवरही निर्बंध घालण्याच्या सूचना देण्यात आल्या.
लेखकाबद्दलटीम मटा ऑनलाइनमहाराष्ट्र टाइम्स ऑनलाइन हा गेल्या २६ वर्षांपासून महाराष्ट्रातील अग्रगण्य पोर्टल आहे. राजकीय, सामाजिक, आर्थिक, कला, क्रीडा, मनोरंजन, लाइफस्टाइल या विषयावर बातम्या देण्याचा आणि वाचकांना अपडेट ठेवण्याचे काम केले जाते. या टीममधील प्रत्येक पत्रकार हा वाचक हा केंद्र बिंदू मानून त्यांना बित्तमबातमी देण्याचा प्रयत्न करतो.… आणखी वाचा
