श्रावण आला की सण-उत्सवांची लगबग सुरू होते आणि मंगळागौरीचा उत्साहही वाढतो.यंदाच्या मंगळागौरीसाठी अभिनेत्री रेश्मा शिंदेच्या मराठमोळ्या लूकमधून स्टायलिश आयडिया घेता येतील.पैठणी नऊवारी, नाजूक ब्लाऊज आणि पारंपरिक दागिन्यांच्या संगमातून तुम्हीही खास लूक साकारू शकता.
पैठणी नऊवारीला द्या पहिली पसंती
मंगळागौरीच्या दिवशी पारंपरिक नऊवारी साडीला विशेष महत्त्व असते. त्यात पैठणीची निवड केली तर संपूर्ण लूकला वेगळाच राजेशाही थाट येतो. पैठणीची ओळखच तिच्या उठावदार रंगसंगती, जरीचा काठ आणि आकर्षक पदरामुळे आहे. महाराष्ट्राच्या वस्त्रपरंपरेत पैठणीला असलेले महत्त्वही वेगळे आहे. मंगळागौरीसाठी हिरव्या रंगाची पैठणी नऊवारी निवडली तर ती सणाच्या वातावरणाला अगदी साजेशी दिसेल. त्यावर गुलाबी, जांभळा किंवा मॅजेंटा रंगाचा ब्लाऊज घातल्यास रंगांचा सुंदर कॉन्ट्रास्ट तयार होऊ शकतो.
ब्लाऊज साधा असला तरी चालेल, पण डिझाईन खास हवं!
भरजरी पैठणीसोबत ब्लाऊज खूप हेवी असण्याची गरज नाही. उलट साडीचा काठ आणि पदर उठून दिसण्यासाठी ब्लाऊजचे डिझाईन नाजूक ठेवले तर लूक अधिक खुलतो.यासाठी छोट्या बाह्यांचा ब्लाऊज, पफ स्लीव्ह, कोपरापर्यंतच्या बाह्या किंवा आकर्षक बॅक डिझाईन असे पर्याय वापरता येतील.ब्लाऊजच्या गळ्याभोवती पैठणीच्या काठासारखी नक्षी किंवा अगदी छोटंसं जरीकाम करून घेता येईल. तुम्हाला आधुनिक टच हवा असेल तर बोट नेक किंवा हलका स्क्वेअर नेकही छान दिसू शकतो. मात्र मंगळागौरीसारख्या पारंपरिक सणासाठी ब्लाऊजच्या डिझाईनमध्ये मराठमोळेपणा टिकवला तर तो अधिक खुलतो.
नथीपासून ठुशीपर्यंत; दागिने निवडताना हे लक्षात ठेवा
नऊवारी साडी नेसूनही दागिने योग्य नसतील तर लूक काहीसा अपूर्ण वाटू शकतो. मंगळागौरीसाठी मात्र दागिन्यांचा साज करताना प्रत्येक गोष्ट एकत्रित दिसतेय का, याकडे लक्ष द्या.नाकात पारंपरिक नथ, गळ्यात ठुशी किंवा तन्मणी, कानात कुड्या आणि हातात हिरव्या बांगड्या असा साज करता येईल. पैठणीचा रंग लक्षात घेऊन बांगड्यांची निवड केल्यास लूक अधिक आकर्षक दिसेल.
केसांचा अंबाडा आणि मोगऱ्याचा गजरा
मंगळागौरीचा लूक म्हटलं की मोगऱ्याचा गजरा आठवतोच. नऊवारीसोबत केसांचा नीटनेटका अंबाडा आणि त्याभोवती गुंफलेला गजरा तुमच्या संपूर्ण लूकला पारंपरिक पूर्णत्व देऊ शकतो.जर चेहरा लांबट असेल तर अंबाडा थोडा खाली ठेवता येईल. गोल चेहऱ्यासाठी अंबाडा किंचित उंच ठेवून पुढच्या बाजूला हलके केस सोडले तर चेहऱ्याला चांगला आकार मिळतो.
कुंकू आणि नथ लूकला देतील खास ओळख
मंगळागौरीच्या दिवशी कपाळावर उठावदार कुंकू लावल्यास नऊवारीचा लूक आणखी सुंदर दिसतो. त्यासोबत नथ असल्यामुळे चेहऱ्यावरचा मराठमोळा अंदाज लगेच जाणवतो.मेकअप मात्र फार जड करण्याची गरज नाही. हलका बेस, थोडासा ब्लश, काजळ, आयलाइनर आणि गुलाबी किंवा लालसर लिपस्टिक एवढाच मेकअप पुरेसा आहे. साडी आणि दागिने आधीच लक्ष वेधून घेणारे असल्याने मेकअपमध्ये साधेपणा ठेवला तर चेहऱ्याचे सौंदर्य अधिक उठून दिसेल
फक्त सुंदर दिसणं नाही, कम्फर्टही महत्त्वाचा
मंगळागौरीच्या रात्री फक्त पूजा नसते. पूजा झाल्यानंतर झिम्मा, फुगडी आणि इतर पारंपरिक खेळांचा आनंद घेतला जातो. त्यामुळे साडी आणि ब्लाऊज जितके सुंदर तितकेच आरामदायी असणेही महत्त्वाचे आहे.नऊवारी नीट नेसलेली आणि आवश्यक ठिकाणी व्यवस्थित पिनअप केलेली असेल तर सतत साडी सांभाळण्याची चिंता राहत नाही. ब्लाऊजचे फिटिंगही आरामदायी असावे. विशेषतः हातांची जास्त हालचाल होणार असल्याने खांद्यावर किंवा बाह्यांमध्ये अडचण निर्माण होणार नाही, याची काळजी घ्या.
लेखकाबद्दलमृणाल पाटीलमृणाल पाटील या महाराष्ट्र टाइम्स.कॉममध्ये कार्यरत असलेल्या अनुभवी पत्रकार आणि डिजिटल कंटेंट रायटर असून मीडिया क्षेत्रात त्यांना 11 वर्षांहून अधिक काळाचा अनुभव आहे. टेलिव्हिजन, डिजिटल मीडिया, प्रिंट पत्रकारिता आणि जनसंपर्क या विविध क्षेत्रांमध्ये काम करत त्यांनी विश्वसनीय,अभ्यासपूर्ण आणि वाचकाभिमुख लेखनाची भक्कम ओळख निर्माण केली आहे. मनोरंजन, लाइफस्टाईल, फिचर स्टोरीज, ट्रेंडिंग विषय आणि सेलिब्रिटी मुलाखती या विषयांवर सखोल माहिती देणारे लेखन हे त्यांचे प्रमुख कौशल्य आहे.
मृणाल यांनी ‘प्रहार’ वर्तमानपत्रामध्ये प्रवास आणि खाद्यसंस्कृती विषयावर साप्ताहिक लेखन केले आहे. विविध शहरांची संस्कृती, स्थानिक परंपरा आणि खाद्यवैशिष्ट्ये यावर आधारित त्यांच्या लेखांना वाचकांकडून उत्तम प्रतिसाद मिळाला आहे. ‘TV 9’ या प्रतिष्ठित न्यूज चॅनलसाठी त्यांनी अनेक नामांकित कलाकारांच्या मुलाखती घेतल्या असून मनोरंजन पत्रकारितेमध्ये त्यांनी भक्कम अनुभव मिळवला आहे. तसेच आकाशवाणी मुंबईसाठी ‘मन की बात’ या कार्यक्रमासाठी व्हॉइस ओव्हरचे काम करण्याचा अनुभव देखील त्यांच्या कार्यात महत्त्वपूर्ण ठरला आहे.
जनसंपर्क क्षेत्रात कार्यरत असताना त्यांनी 30 पेक्षा अधिक क्लायंट्सचे यशस्वीपणे व्यवस्थापन केले असून ब्रँड कम्युनिकेशन, कंटेंट स्ट्रॅटेजी आणि मीडिया समन्वय यामध्ये त्यांनी उल्लेखनीय कामगिरी केली आहे. सध्या महाराष्ट्र टाइम्समध्ये ट्रेंडिंग आणि लाईफस्टाईल विषयांवर संशोधनाधारित, अचूक आणि विश्वसनीय माहिती देणारे लेख लिहिणे ही त्यांची विशेष ओळख आहे. तथ्य पडताळणी, विश्वासार्ह स्रोतांचा वापर आणि वाचकांसाठी उपयुक्त माहिती सादर करण्यावर त्यांचा विशेष भर असतो.
लेखनासोबतच वाचन आणि सोलो ट्रॅव्हलिंग ही त्यांची आवड असून विविध ठिकाणांच्या संस्कृती, जीवनशैली आणि सामाजिक रचनेचा अभ्यास करण्यामध्ये त्यांना विशेष रस आहे. व्यायाम, हॉलिवूड चित्रपट आणि नव्या तंत्रज्ञानाविषयी माहिती मिळवणे हे देखील त्यांचे आवडते छंद आहेत. आपल्या अनुभव, संशोधन आणि निरीक्षणांच्या आधारे वाचकांना दर्जेदार, अचूक आणि विश्वासार्ह माहिती देण्याचा त्या सातत्याने प्रयत्न करतात.
शैक्षणिक पात्रता
मृणाल पाटील यांनी 2017-18 मध्ये मुंबई विद्यापीठातून मास्टर ऑफ आर्ट्स इन कम्युनिकेशन अँड जर्नालिझम (MACJ) पदवी प्राप्त केली आहे. डिजिटल मीडिया ट्रेंड्स, बदलती वाचक प्रवृत्ती आणि माहिती सादरीकरणाच्या आधुनिक पद्धतींचा त्या सातत्याने अभ्यास करतात.… आणखी वाचा
