भारताच्या ब्रिक्स अध्यक्षपदाच्या कार्यकाळात ब्रिक्स समूहातील देशांच्या दळणवळण मंत्र्यांची १२ वी बैठक उद्या (२१ ऑगस्ट) आयोजित करण्यात आली आहे. केंद्रीय दळणवळण मंत्री ज्योतिरादित्य एम. शिंदे यांच्या अध्यक्षतेखाली ही बैठक होणार असून, यात ब्रिक्स सदस्य देशांचे दळणवळण मंत्री आणि वरिष्ठ प्रतिनिधी सहभागी होतील. माहिती व दळणवळण तंत्रज्ञान (आयसीटी), डिजिटल परिवर्तन, नवोन्मेष आणि सक्षम डिजिटल पायाभूत सुविधांच्या विकासासाठी परस्पर सहकार्य वाढविण्यावर या बैठकीत चर्चा केली जाईल. भारताच्या ब्रिक्स अध्यक्षपदाची मध्यवर्ती संकल्पना ‘लवचिकता, नवोन्मेष, सहकार्य आणि शाश्वततेच्या पायाभरणीद्वारे उभारणी’ अशी आहे. या अंतर्गत आयसीटी क्षेत्रासाठी ‘नवोन्मेष, सहकार्य आणि परिवर्तनाद्वारे लवचिक भविष्याची पायाभरणी’ हे सूत्र निश्चित करण्यात आले आहे. या पार्श्वभूमीवर, समावेशक, सुरक्षित आणि शाश्वत डिजिटल विकासाला चालना देण्यासह ब्रिक्स देशांमधील तंत्रज्ञानविषयक सहकार्य अधिक मजबूत करण्यावर भारताचा भर आहे. या बैठकीत उदयोन्मुख तंत्रज्ञान, डिजिटल सार्वजनिक पायाभूत सुविधा, भविष्यातील दूरसंचार नेटवर्क, सायबर सुरक्षा, क्षमता बांधणी आणि सर्वसमावेशक डिजिटल संपर्क व्यवस्था या प्रमुख विषयांवर विचारविनिमय होईल. ब्रिक्स सदस्य देशांमध्ये व्यावहारिक सहकार्य वाढविणे आणि डिजिटल परिवर्तनाच्या क्षेत्रातील सर्वोत्तम कार्यपद्धतींची देवाणघेवाण करण्यावरही भर दिला जाईल. भारताच्या अध्यक्षपदाच्या काळात लवचिक डिजिटल पायाभूत सुविधा, भविष्यातील नेटवर्क, सायबर सुरक्षा, डिजिटल सार्वजनिक पायाभूत सुविधा, नवोन्मेष आणि क्षमता बांधणी या विषयांवर विशेष लक्ष केंद्रित करण्यात आले आहे. ‘ब्रिक्स क्षमता बांधणी केंद्रे’ उभारणे तसेच उदयोन्मुख तंत्रज्ञानाच्या क्षेत्रात सहकार्य वाढविणे यांसारख्या विषयांवरही चर्चा सुरू आहे. या बैठकीत मागील (११ व्या) ब्रिक्स दळणवळण मंत्र्यांच्या बैठकीतील निर्णय आणि सहकार्याच्या क्षेत्रांचा आढावा घेतला जाईल. मागील बैठकीत आयसीटी, डिजिटल सार्वजनिक पायाभूत सुविधा आणि जागतिक डिजिटल प्रशासन या क्षेत्रांतील सहकार्य सातत्याने पुढे नेण्याच्या गरजेवर भर देण्यात आला होता. बैठकीनंतर केंद्रीय मंत्री ज्योतिरादित्य शिंदे प्रसारमाध्यमांशी संवाद साधून बैठकीतील प्रमुख चर्चा आणि निष्कर्षांची माहिती देतील. त्यानंतर ते ‘डिजिटल ब्रिक्स फोरम एक्स्पो’ला भेट देतील. या प्रदर्शनात ब्रिक्स समूहाशी संबंधित डिजिटल तंत्रज्ञान, नाविन्यपूर्ण संकल्पना आणि विविध उपाययोजना सादर केल्या जाणार आहेत. ब्रिक्स अध्यक्षपदाच्या काळात आयोजित होणारी ही बैठक डिजिटल क्षेत्रातील सहकार्याच्या दृष्टीने महत्त्वाची मानली जात आहे. आयसीटी क्षेत्रातील परस्पर सहकार्याच्या माध्यमातून ब्रिक्स देशांमध्ये अधिक लवचिक, सुरक्षित, सर्वसमावेशक आणि शाश्वत डिजिटल व्यवस्था उभारण्याच्या दिशेने या बैठकीत महत्त्वपूर्ण निर्णय होण्याची अपेक्षा आहे.
Source link
ब्रिक्स दळणवळण मंत्र्यांची 12 वी बैठक उद्या:ज्योतिरादित्य शिंदे अध्यक्षस्थानी; डिजिटल तंत्रज्ञान, सायबर सुरक्षेवर चर्चा
