तैवानमध्ये आयोजित Computex 2026 टेक प्रदर्शनात Qualcomm च्या ‘Dragonwing IQ10’ AI प्लॅटफॉर्मवर चालणारा प्रगत ह्युमॅनोइड रोबोट थेट सादरीकरणादरम्यान स्टेजवर तोंडात उताणा पडला. तात्पुरत्या तांत्रिक बिघाडामुळे सिस्टिमने ‘सेफ-कोलॅप्स’ मोड सक्रिय केल्याने रोबोट नियंत्रित पद्धतीने खाली पडला, ज्याचा व्हिडिओ सोशल मीडियावर प्रचंड व्हायरल झाला आहे. नेमका काय प्रकार घडला जाणून घेऊया.
तंत्रज्ञान क्षेत्रातील जागतिक स्तरावर सर्वात मोठ्या मानल्या जाणाऱ्या Computex 2026 या प्रदर्शनात एक अजब आणि धक्कादायक घटना घडली आहे. मानवी बुद्धिमत्तेला आव्हान देणाऱ्या आर्टिफिशियल इंटेलिजन्स (AI) क्षेत्रातील एका प्रगत ह्युमॅनोइड रोबोटचे Live Demo सुरू असताना, तो अचानक स्टेजवर तोंडात उताणा पडला. या घटनेचा व्हिडिओ सोशल मीडियावर वाऱ्यासारखा व्हायरल झाला असून, जगभरातील टेक विश्वात याची जोरदार चर्चा सुरू आहे.
नेमकी घटना काय घडली?
प्रसिद्ध अमेरिकन टेक कंपनी Qualcomm च्या मुख्य सादरीकरणादरम्यान हा प्रकार घडला. क्वालकॉमचा भागीदार असलेल्या ‘ न्यूरा रोबोटिक्स ‘ (NEURA Robotics) कंपनीने विकसित केलेला ‘4NE-1’ नावाचा ह्युमॅनोइड रोबोट स्टेजवर आणण्यात आला होता. हा रोबोट Qualcomm च्या अत्यंत प्रगत अशा ‘Dragonwing IQ10’ AI प्लॅटफॉर्मवर काम करत होता.
स्टेजवर मुख्य निवेदक रोबोटच्या आणि स्वतःच्या भविष्याबद्दल माहिती देत असताना, रोबोट अगदी संथ आणि मानवी गतीने चालत स्टेजच्या मध्यभागी आला. निवेदकाचे भाषण सुरू असतानाच, अचानक या रोबोटचे संतुलन बिघडले. तो पुढच्या बाजूला झुकला आणि थेट स्टेजवर जोरात कोसळला. पडताना त्याने आपला एक हात वर केला, जणू काही तो “मी ठीक आहे” असे सुचवत होता. ही हालचाल इतकी हुबेहूब मानवासारखी होती की तिथे उपस्थित असलेले लोक काही सेकंद स्तब्ध झाले.
तांत्रिक बिघाड आणि Qualcomm चे स्पष्टीकरण
रोबोट पडल्यानंतर स्टेजवरील कर्मचाऱ्यांची एकच तारांबळ उडाली. दोन-तीन तंत्रज्ञांनी तात्काळ स्टेजवर धाव घेतली. त्यांनी त्या भव्य रोबोटला एका काळ्या कपड्याने झाकले आणि अत्यंत विचित्र अवस्थेत उचलून स्टेजबाहेर नेले. या संपूर्ण गोंधळातही मुख्य निवेदकाने आपले प्रसंगावधान राखत भाषण सुरू ठेवले.
या घटनेनंतर Qualcomm आणि न्यूरा रोबोटिक्सने अधिकृत निवेदन जारी केले. कंपनीने स्पष्ट केले की, हा कोणताही गंभीर बिघाड नव्हता, तर सादरीकरणादरम्यान सिस्टिममध्ये एक तात्पुरता Communication Glitch म्हणजेच संवाद बिघाड निर्माण झाला होता. हा बिघाड ओळखताच रोबोटच्या अंतर्गत सॉफ्टवेअरने Safe-collapse मोड सक्रिय केला. आजूबाजूच्या लोकांना किंवा महागड्या उपकरणांना कोणतीही इजा होऊ नये म्हणून रोबोट स्वतःहून नियंत्रित पद्धतीने खाली पडला.
भविष्यासाठी मौल्यवान धडा
लाइव्ह डेमो दरम्यान रोबोट पडल्यामुळे तंत्रज्ञांचे चेहरे जरी लाल झाले असले, तरी Qualcomm ने या घटनेची सकारात्मक बाजू पाहिली आहे. कंपनीने म्हटले आहे की, “वास्तविक जगात काम करताना अशा आव्हानांना सामोरे जावे लागते. या अपघातातून मिळालेला डेटा आम्हाला भविष्यात अधिक सुरक्षित आणि विश्वासार्ह रोबोटिक्स सिस्टिम विकसित करण्यासाठी मदत करेल.”
सोशल मीडियावर या घटनेचे शेकडो मीम्स बनवले जात असून, नेटिझन्स “रोबोटला सुट्टी हवी आहे” किंवा “AI ला सुद्धा थकवा येतो” अशा मजेशीर प्रतिक्रिया देत आहेत.
लेखकाबद्दलशुभम कुलकर्णीशुभम कुलकर्णी जवळपास 6 वर्षांपासून मराठी माध्यमांमध्ये काम करतोय. आकाशवाणी (छत्रपती संभाजीनगर) पासून माध्यम क्षेत्रात कामाला सुरुवात केली. एका मुखपत्रासह मुंबईतील नामांकित मराठी वृत्तवाहिन्यांमध्ये ‘बुलेटिन प्रोड्यूसर’ म्हणून जबाबदारी सांभाळली. शुभमला राजधानी दिल्लीतही बातमीवर संस्कार करण्याची संधी मिळाली. राजकारण, व्यापार-उद्योग, क्रीडा, तंत्रज्ञान, ऑटो या विषयावर लिहायला त्याला आवडतं. निसर्गाच्या सानिध्यात बसायला, फावल्या वेळेत चित्रपट, वेब सिरीज पाहाण्याचा शुभमचा छंद आहे.… आणखी वाचा