Nashik Dengue Cases:सध्या सुरू असलेल्या जोरदार पावसामुळे आरोग्याला घातक असणाऱ्या डेंग्यूच्या मच्छरांची संख्या वाढलेली याचाच परिणाम नाशिककरांच्या आरोग्यावर होताना दिसतोय. नाशिकमध्ये जुलैच्या तीन आठवड्यात २२ डेंग्यूचे रुग्ण आढळून आले. तर संशयितांचा आकडा २६० पर्यंत पोहचला आहे.
पावसाळ्याच्या पार्श्वभूमीवर एकीकडे डेंग्यूसह साथीच्या आजारांचे रुग्ण वाढले असताना धूरफवारणी मात्र कागदावरच होत असल्याचे चित्र आहे. जुलै महिन्यात चिकनगुनियाचेही २ रुग्ण आढळून आले असून, साथीच्या आजाराने डोकं वर काढल्याचे चित्र आहे.
नाशिककरांना डेंग्यूची लागण
शहरात दरवर्षी पावसाळा आला की डेंग्यू, मलेरिया, चिकनगुनिया यासारख्या किटकजन्य आजारांचा प्रादुर्भाव होतो. एडिस एजिप्ती नावाचे मादी डास डेंग्यूच्या प्रसारास कारणीभूत ठरतात. या डासांचा प्रादुर्भाव स्वच्छ पाण्यात होतो. यंदाही नाशिकककरांना डेंग्यूचा डंख लागला आहे. घरांच्या परिसरातील भंगार साहित्य, निकामी टायर्स, शोभेच्या झाडांच्या कुंड्यांमध्ये पावसाचे पाणी साचून त्यात डेंग्यूस कारणीभूत ठरणाऱ्या डासांची पैदास झाल्याने नाशिककरांना डेंग्यूची लागण झाली आहे.
चिकनगुनियाचे देखील आढळले दोन रुग्ण
जुलै महिन्यात पावसाळा सुरू होताच जुलैच्या गेल्या २१ दिवसांतच डेंग्यू सदृश आजाराचे २३८ रुग्ण आढळले होते. प्रयोगशाळेतील रक्त नमुन्यांच्या तपासणीअंती २२ जणांना डेंग्यूची लागण झाल्याचे समोर आले. याचाच अर्थ डेंग्युचा दररोज एक नवा रुग्ण आढळत आहे, तर डेंग्यू पाठोपाठ नाशिकला चिकनगुनियाचीदेखील लागण झाली आहे. जुलै महिन्यात आतापर्यंत चिकनगुनियाचे दोन रुग्ण आढळून आले असून, जानेवारीपासून पाच रुग्ण झाले आहेत.
धूर फवारणी नावालाच
आतापर्यंत चिकनगुनियाचे ६२४ संशयित निष्पन्न झाले आहेत. सोबतच तापसदृश आजाराच्या रुग्णांचा आकडा हा मोठा असून, त्यांची नोंद मात्र होत नसल्याचे चित्र आहे. त्यामुळे पावसाळा सुरू होताच, शहरात साथीच्या आजारांनी उच्छाद मांडल्याचे चित्र आहे, तर दुसरीकडे महापालिकेकडून होणारी धूर फवारणी मात्र कागदावरच होत असल्याचे चित्र आहे.
खासगी रुग्णालायांकडून महापालिकेच्या वैद्यकीय विभागाला माहिती पोहचेणा
खासगी रुग्णालयात उपचारासाठी दाखल होणाऱ्या डेंग्यू रुग्णांची माहिती महापालिकेच्या वैद्यकीय विभागाला कळविणे संबंधित रुग्णालयांवर बंधनकारक आहे. मात्र, अनेक खासगी रुग्णालये ही माहिती कळवित नाहीत. त्यामुळे डेंग्यूच्या प्रादुर्भावाचा निश्चित आकडा समोर येऊ शकलेला नाही. महापालिकेच्या वैद्यकीय विभागाकडे नोंद असलेल्या आकडेवारीपेक्षा डेंग्यूच्या रुग्णांची संख्या कितीतरी पटीने अधिक असण्याची शक्यता नाकारता येत नाही.
वाढता संसर्ग नाशिककरांच्या आरोग्यावर परिणाम करणारा
पावसाचं आगम होताच ओलाव्याला धरून येणाऱ्या मच्छारांची संख्या देखील चांगलीच बळावल्याने त्याचा थेट परिणाम नागरिकांच्या आरोग्यावर होताना दिसत आहे.नाशिकमध्ये डेंग्यूची लागण ही गेले सहा महिने काही प्रमाणात चालू आहे. जानेवारीमध्ये ६ रूग्ण, फेब्रुवारीत ३, मार्चमध्ये २ ,एप्रिलमध्ये १, मे ३, जूनमध्ये ८, तर पावसामुळे जुलैमध्ये हा आकडा २२ वर जाऊन पोहचला. पावसाचा हा उद्रेक आणि डेंग्यूचा वाढता संसर्ग नाशिककरांच्या आरोग्यावर परिणाम करणारा आहे .
लेखकाबद्दलटीम मटा ऑनलाइनमहाराष्ट्र टाइम्स ऑनलाइन हा गेल्या २६ वर्षांपासून महाराष्ट्रातील अग्रगण्य पोर्टल आहे. राजकीय, सामाजिक, आर्थिक, कला, क्रीडा, मनोरंजन, लाइफस्टाइल या विषयावर बातम्या देण्याचा आणि वाचकांना अपडेट ठेवण्याचे काम केले जाते. या टीममधील प्रत्येक पत्रकार हा वाचक हा केंद्र बिंदू मानून त्यांना बित्तमबातमी देण्याचा प्रयत्न करतो.… आणखी वाचा
