कांदिवलीच्या लालजीपाडा परिसरामध्ये रविवारी मनोज चौहान या तरुणाची गोळी झाडून हत्या करण्यात आली. लालजीपाडा येथील गणेश नगरात राहणारा मनोज रविवारी सकाळी इमारतीवरून खाली उतरला. सकाळी सातच्या सुमारास त्याच्यावर गोळीबार करण्यात आला. या गोळीबारात त्याचा जागीच मृत्यू झाला. दिवसाढवळ्या झालेल्या या गोळीबारामुळे रहिवाशांमध्ये घबराट पसरली होती. गोळीबाराची माहिती मिळताच कांदिवली पोलिसांनी गुन्हा दाखल करून आरोपीचा शोध सुरू केला.
पतीचा खून होताच पत्नी पोलिसांच्या रडावर..
सुरुवातीच्या तपासामध्ये पोलिसांनी आधी यांच्या पत्नीवर बारीक लक्ष ठेवले होते. तिच्या फोनचे रेकॉर्ड तपासले असता एका रोहित पाल नावाच्या व्यक्तीशी ती फोनवर बोलली असल्याचं समोर आलं. यानंतर पोलिसांनी संबंधित नंबरचे लोकेशन तपासले असता ते घटनास्थळानजिक असल्याचं आढळलं. यानंतर अधिक तपास केला असता, पोलिसांनी याप्रकरणी रोहित पाल या तरुणाला अटक केली. .
मनोजवर गोळीबार करणाऱ्या तरुणाचे नाव रोहित पाल असल्याचे सीसीटीव्ही फुटेजमधून कळले. त्याआधारे पोलिसांची पथके प्रयागराजपर्यंत पोहोचली आणि मुसक्या आवळल्या. रोहित पाल याची कसून चौकशी केली असता धक्कादायक लव्ह कनेक्शन समोर आलं आहे. व्यापारी मनोज चौहान यांची गोळ्या झाडून हत्या करणारा व्यक्ती हा उत्तर प्रदेशातील चौहान यांच्या पत्नीचा प्रियकर होता, असे पोलिसांनी सांगितले. मुंबईत येऊन हत्या केल्यानंतर आरोपी रोहित हा पळून गेला होता. त्याला पोलिसांनी नैनी रेल्वे स्थानकावरून अटक केली. पाल शहरातून ट्रेनमधून घरी परतत असताना असताना त्याला ताब्यात घेण्यात आले.
सलूनमध्ये जाताना मागून गोळीबार…
दरम्यान, मनोज चौहान (३२) आपल्या भावासोबत कांदिवली इथं राहत होते. तिथे त्यांचा इमिटेशन ज्वेलरीचा व्यवसाय होता. त्यांची २६ वर्षीय पत्नी आणि त्यांची दोन मुलं उत्तर प्रदेशातील जौनपूर इथं राहत होती. रविवारी सकाळी ७.४५ च्या सुमारास चौहान हे केस कापण्यासाठी सलूनमध्ये जात असताना मागून आलेल्या एका व्यक्तीने त्यांच्यावर गोळ्या झाडल्या. पण पहिल्या प्रयत्नात नेम चुकल्यामुळे दुसऱ्या गोळीबारामध्ये त्याने मनोज यांच्या मानेवर गोळी झाडली.
पोलिसांनी रोहित पाल आणि मनोज यांच्या पत्नीचे फोन रेकॉर्ड तपासले असता गोळीबाराच्या अर्धा तास आधी पाल याने मनोज यांच्या पत्नीला फोन केला होता. मात्र, त्याचं स्पष्ट असं बोलणं झालं नाही. मनोजची पत्नी आणि रोहित हे बालपणीचे मित्र होते. एका कॉमन फ्रेंडच्या माध्यमातून त्यांची पुन्हा भेट झाली होती. गेल्या ३-४ वर्षांपासून ते एकमेकांच्या जवळ असल्याची माहितीही पोलिसांनी दिली.
Crime Diary: हत्येसाठी बायकोने दिली बंदूक, दोघांना लगेच केलं ठार; माजी नगरसेवकाचा थरारक खूनी खेळ
पत्नीला भेटण्यासाठी आलेल्या रोहितला रंगेहात पकडलं…
पोलिसांनी दिलेल्या माहितीनुसार, रोहित मनोज यांच्या पत्नीला भेटण्याचा प्रयत्न करत होता, त्यावेळी त्यांनी रंगेहात पकडलं होतं. तेव्हा रोहितला मारहाण करत त्याला बायकोपासून लांब राहण्यासाठी सांगण्यात आलं होतं. त्यामुळे डिसेंबरपासूनच त्यांच्यामध्ये वाद सुरू होता. पण तरीदेखील रोहितचे मनोजच्या पत्नीशी फोनवर बोलणे सुरू होते.
स्थानिक पुढाऱ्यांना घाम फोडणाऱ्या नेत्याची पुण्यात गोळ्या घालून हत्या
यूपीमध्ये बंदूक चालवण्याचा सराव…
सगळ्यात धक्कादायक बाब म्हणजे २ जून रोजी मनोज हा गावी आपल्या कुटुंबाला भेटण्यासाठी जाणार होता. पण हे बायको आणि प्रियकर रोहितला नको होतं. त्यामुळे त्यांनी प्रेमात अडसर ठरणाऱ्या पतीला कायमचं मारण्याचं ठरवलं. रोहितने २ मे रोजीच मुंबई गाठली. यांतर तो परत गावी गेला आणि २५ मे रोजी परत आला. हत्येच्या ३ दिवस आधीच तो मुंबईत आला होता. गंभीर म्हणजे बंदूक चालण्यासाठी रोहित याने विशेष सरावही केला असल्याचं समोर आलं आहे.
मुंबईत येत आपल्या प्रेयसीच्या पतीचा निर्दयीपद्धतीने खून केल्यानंतर, आरोपी रोहित याने फोन बंद करत तो फरार झाला. पालच्या कॉल रेकॉर्डिंगमुळे अखेर त्याचं भिंग फुटलं आणि खूनाच्या प्रकरणाचा उलगडा झाला. पाल याने घटनेनंतर रिव्हॉल्व्हर फेकून दिल्याचंही तपास अधिकाऱ्यांना सांगितलं आहे.
लेखकाबद्दलरेणुका धायबररेणुका धायबर, महाराष्ट्र टाइम्समध्ये Senior Digital Content Producer आहेत. डिजिटल पत्रकारितेचा आठ वर्षांचा अनुभव आहे. २०१४ पासून पत्रकारीतेत आहेत. झी २४ तास , न्यूज १८ लोकमत, टीव्ही ९ अशा वेबसाइटसाठी त्यांनी काम केले आहे. महाराष्ट्र, राजकारण, गुन्हेगारी, देश, विदेश, स्पेशल बातम्या यासोबत व्यवसाय विषयात त्यांची आवड आहे.… आणखी वाचा
