Boy Dies: आई, मी प्रसाद घेऊन येतो! दिव्येश घरातून निघाला; लक्झरी बसच्या दारात विचित्र अपघात, लहानग्याचा शेवट

सूर्यनगर-तरसाली बायपासहून धन्यावीकडे जाणाऱ्या मार्गावर एका गॅरेजमध्ये लक्झरी बस उभी होती. या बसच्या दरवाज्यात मान अडकल्यानं ७ वर्षीय मुलाचा वेदनादायी अंत झाला. ‘मी प्रसाद घ्यायला जातो,’ असं सांगून तो घरातून निघाला होता. पण पुढच्या काही मिनिटांत त्याला मृत्यूनं गाठलं. मुलाच्या निधनाचं वृत्त समजताच कष्टकरी कुटुंब शोकसागरात बुडालं. घटनेची माहिती मिळताच कपुराई पोलीस ठाण्याचं पथक दुर्घटनास्थळी पोहोचलं.

बुधवारी संध्याकाळच्या सुमारास ही दुर्दैवी घटना घडली. वडोदरा शहराच्या सीमावर्ती भागात एक बस उभी होती. तिथे ७ वर्षांचा दिव्येश राठवा खेळत होता. खेळता खेळता तो गॅरेज जवळ उभ्या असलेल्या बसमध्ये चढला. दिव्येश बसमध्ये शिरताच बसचं दार अचानक बंद झालं आणि दिव्येशची मान अडकली.

दिव्येशचा मृ्त्यू कोणत्या परिस्थितीत झाला, त्यावेळचा नेमका घटनाक्रम काय होता, याचा तपास सुरू असल्याची माहिती पोलीस उपायुक्त अभिषेक गुप्ता यांनी दिली. या प्रकरणी अपघाती मृत्यूची नोंद करण्यात आल्याचं त्यांनी सांगितलं. दिव्येशचे आई, वडील मोलमजुरी करून कुटुंबाचा उदरनिर्वाह चालवतात. गॅरेजच्या मागेच ते वास्तव्याला आहेत.

प्रसाद आणण्यासाठी बाजारात जातो असं आईला सांगून दिव्येश घरातून बाहेर पडला होता. तो बराच वेळ उलटूनही घरी परतला नाही. त्यामुळे कुटुंबानं त्याचा शोध सुरू केला. त्यांचा शेवट बसपाशी येऊन संपला. तिथे त्यांना दिव्येशाची मान बसच्या दारात अडकलेली दिसली.

बसजवळ असलेल्या सीसीटीव्हीचं फुटेज पोलिसांनी ताब्यात घेतलं आहे. त्यात गॅरेज जवळ असलेले दोघे जण दिव्येशला वाचवण्याचा प्रयत्न करताना दिसत आहे. दिव्येश अडकला असल्याचं दिसताच त्यांनी बसचं दार ढकलून ते उघडण्याचा प्रयत्न केला होता. पण तोपर्यंत दिव्येशची शुद्ध हरपली होती. त्याला त्याच अवस्थेत रुग्णालयात नेण्यात आलं. तिथल्या डॉक्टरांनी त्याला तपासून मृत घोषित केलं.