Nagpur News: नवी मुंबईत साकार होणार विदर्भ भवन खारघरमध्ये आणि पनवेलमध्ये मोठ्या प्रमाणात विदर्भातील कुटुंबे वास्तव्याला आहेत.यांना स्वत:चे हक्काचे केंद्र उपलब्ध व्हायला हवे या उद्देशाने खारघरमध्ये दोन एकर जागेचा प्रस्ताव सादर करण्यात आला.
या उद्देशाने ‘विदर्भ भवन’ उभारण्याची मागणी
नवी मुंबई , खारघर आणि पनवेल परिसरात विदर्भातील मोठ्या संख्येने कुटुंबे वास्तव्यास आहेत. या नागरिकांना सामाजिक, सांस्कृतिक आणि शैक्षणिक उपक्रमांसाठी हक्काचे केंद्र उपलब्ध व्हावे, तसेच विदर्भातून नवी मुंबईत येणाऱ्या नागरिकांना तात्पुरत्या स्वरूपात विविध सुविधा मिळाव्यात, या उद्देशाने ‘विदर्भ भवन’ उभारण्याची मागणी करण्यात आली होती.
मुख्यमंत्री तसेच महसूलमंत्री चंद्रशेखर बावनकुळे यांच्याकडे मागणी
हिवाळी अधिवेशन २०२६ दरम्यान आमदार प्रवीण दटके यांनी मुख्यमंत्री तसेच महसूलमंत्री चंद्रशेखर बावनकुळे यांच्याकडे या मागणीसाठी पाठपुरावा केला होता. भवनासाठी शासनाकडून दोन एकर जागा उपलब्ध करून द्यावी आणि आवश्यकता भासल्यास प्रकल्पासाठी सीएसआर निधीचा वापर करण्याची परवानगी द्यावी, अशी मागणी त्यांनी केली होती.
दोन एकर जागेचा प्रस्ताव शासनाकडे सादर करण्याचे निर्देश
या पार्श्वभूमीवर झालेल्या बैठकीत बावनकुळे यांनी खारघर परिसरातील उपलब्ध दोन एकर जागेचा प्रस्ताव शासनाकडे सादर करण्याचे निर्देश दिले. बैठकीत आमदार प्रवीण दटके व्हिडीओ कॉन्फरन्सिंगद्वारे सहभागी झाले होते. आमदार विक्रांत पाटील तसेच विदर्भ सेवा फाउंडेशनचे चित्तरंजन टेंभेकर यांचीही उपस्थिती होती.
विदर्भ भवनाची गरज निदर्शनास आणून देण्यात आले.
‘विदर्भ सेवा सहयोग फाउंडेशन’ या संस्थेमार्फत नवी मुंबई, खारघर आणि पनवेल परिसरातील विदर्भातील नागरिकांसाठी विविध सामाजिक, सांस्कृतिक आणि शैक्षणिक उपक्रम राबविले जात आहेत. या उपक्रमांना कायमस्वरूपी व्यासपीठ मिळावे, यासाठी विदर्भ भवनाची गरज असल्याचे शासनाच्या निदर्शनास आणून देण्यात आले.
विदर्भातील नागरिकांना मोठा फायदा
नवी मुंबई परिसरातील विदर्भ परिवारांना एकत्र येण्यासाठी तसेच विविध कार्यक्रम आणि उपक्रम राबविण्यासाठी एक केंद्र उपलब्ध झाल्यास त्याचा मोठा फायदा होईल, असे आमदार प्रवीण दटके यांनी बैठकीत सांगितले. दरम्यान, ‘विदर्भ भवन’च्या माध्यमातून विदर्भातील नागरिकांना मोठा फायदा होईल, असे महसूलमंत्री चंद्रशेखर बावनकुळे यांनी या वेळी सांगितले.
लेखकाबद्दलटीम मटा ऑनलाइनमहाराष्ट्र टाइम्स ऑनलाइन हा गेल्या २६ वर्षांपासून महाराष्ट्रातील अग्रगण्य पोर्टल आहे. राजकीय, सामाजिक, आर्थिक, कला, क्रीडा, मनोरंजन, लाइफस्टाइल या विषयावर बातम्या देण्याचा आणि वाचकांना अपडेट ठेवण्याचे काम केले जाते. या टीममधील प्रत्येक पत्रकार हा वाचक हा केंद्र बिंदू मानून त्यांना बित्तमबातमी देण्याचा प्रयत्न करतो.… आणखी वाचा
